Profil Wirausaha

Gethuk Lindri Dados Kunci

       Ibu Titi (47) ingkang manggen wonten ing Desa Sidodadi, kecamatan Kertek, Kabupaten Wonosobo menika salah satunggal wirausaha

gethuk lindri. Panjenenganipun sampun miwiti usahanipun wiwit 7 taun kapengker. Ibu Titi ingkang kula sowani wonten ing dalemipun, nalika tabuh 15.20, tanggal 15 Desember 2013 menika nyariyosaken pengalamanipun sajroning nglampahaken usaha gethuk lindri. Wiwiwtanipun Ibu Titi namung damel gethuk lindri kangge camilan kulawarganipun. Nalika wonten tangga teparo ingkang dolan, tangganipun menika lajeng nyicipi gethul lindri menika. Tangganipun paring panyaruwe supados gethuk lindri kasebut dipunsade, amargi rasanipun ingkang eco saha taksih sekedhik dipunpanggihaken wonten ing pasaran. Ibu Titi milai kepincut, ngangge modal awal 100ewu rupiyah, Ibu Titi milai bereksperimen. Sepisan Ibu Titi nitipaken gethuk lindri wonten ing warung-warung. Sasampunipun dipunetang-etang, asilipun dipunraos lumayan. Untungipun saged nyandhak 100% saking modal. Lajeng Ibu Titi menggalih bilih panjenenganipun saged nyade piyambak. Kinten-kinten kalih taun, Ibu Titi nyadi gethuk lindri menika piyambak kanthi cara keliling desa. Untungipun saged langkung inggil inggih menika 200% saking modal awal. Dumadakan wonten tangganipun Ibu Titi ingkang mbetahaken pakaryan. Lajeng tangganipun Ibu Titi nyuwun dipundamelaken gethuk lindri, Ibu Titi nyanggupi, dados Ibu Titi gadhah 1 karyawan. Taun kanthi taun karyawan Ibu Titi langkung kathah. Waunipun namung satunggal samenika sampun 25 karyawan. Penghasilanipun Ibu Titi sampun kathah, ngendikanipun lumayan sampun saged kangge maneka warni kabetahan. Saking singkong ingkang biasanipun namung dipunsepelekaken, ternyata samenika wonten ing astanipun Ibu Titi saged dados panganan ingkang eco saha boten mboseni.

geguritanku

Sajroning Rasa

Ing rasa iki rasane nggugahke ati

Tumrap manah ingsun klawan sira

Sing ngudang-ngudang asmara

Tresna welas lan asih

Dak golekna sambunging nala

                                    Lingsire wengi sing tanpa sasangka

                                    Petenge pedhut ngalangi ing jaladara

                                    Rasane sumrebed ing sajroning jiwa

                                    Pentering srengenge isuk

                                    Ndhudhah ati ing rasa pati

Tresnaku mung sawiji

Tan mrelokake manah liyan

Kang sumeneb ana ing sajroning nala

guritku

Sing Dak Anti-anti

Krelip lintang ing tawang

Endahing candra kang sumunar

Anggawa sliraku ing awang-awang

Sumreseping bayu neng mbun-mbunan

Tansah ngelingake sliramu

Wong kang wus mbundheli atiku

                              Doh kana, doh kene

Mung bisa sawang-sinawang

Saka tembung kang karonce

Sansaya agawe cidraning nala

Nambah kapang jroning dhadha

Dina baka dina dak lakoni

Kanthi nglangut ing sepi

Sliramu sing dak anti-anti

Tetep tuhu ing janji

Kang kaocap saka lathi

Bakal kapethuk

Nggayuh sumpena kang wus ana

Pengalaman

Ora Nyana

       Nalika aku arep daftar pawiyatan luhur, aku pontang-panting dhewe golek persyaratan. Saka golek surat katrangan saka pak lurah, nganti tekan daftar online lan sapanunggalane. Wektu aku nyuwun surat katrangan saka pak lurah, aku nyepedha onthel menyang daleme pak lurah. Sore-sore nyepedha onthel kudune ngrasa seger, nanging amarga sepedha onthele kedhuwuren, aku malah ngrasa ora penak. Tekan tengah dalan aku mandheg, bingung daleme pak lurah sing endi, mula aku takon marang wong sing ana ing pinggir dalan. Sawise kuwi aku kepanggih pak lurah, surat katrangan digawe lan langsung dadi. Aku pamit lan langsung mulih. Ana ing tengah dalan, dumadakan banyu saka langit netes. Aku cepet-cepet anggone nyepedha. Ndilalahe dalane nanjak, yo wis pancen nasib batinku. Akhire aku nuntun sepedha onthel kuwi karo grimisan. Tekan omah, klambiku teles kebes, nanging untung wae surat katrangan isih bisa diwaca.

Sabanjure kuwi aku ndaftar pawiyatan luhur lewat internet alias online. Wektu kuwi isih rame-ramene padha daftaran online. Padha rebutan warnet, ndilalahe warnete lemot banget. Aku lan kancaku nganti pindhah ing pirang-pirang warnet. Malah dumadakan ana kabar yen pendhaftarane wis tutup. Aku lan kancaku wedi banget, mosok yo perjuangane wingi sia-sia. Aku lan kancaku tetep njajal ndaftar, adile Gusti Allah, aku lan kancaku kuwi isih bisa daftar. Rasa lega durung plong, isih ana pengumuman. Wektu pengumuman, aku wis pasrah, ketampa ya alhamdulilah, ora ya wis aku nyambut gawe. Ndilalahe Gusti Allah kuwi mangerteni endi sing berjuang tenanan endi sing ora. Ora nyana alhamdulilah aku ketampa ana ing pawiyatan luhur, lega rasane, cumeplong atine.

GEGURITAN

Pangajap Suci

Tresna sing ning dhadha dak jaga ing saben dina

Tresna ning ati dak uri-uri saben wengi

Tresna kang rembuyung nambahi ati kang wuyung

Nganti tresnaku tansah cinanggung

Lintang lan rembulan dadi saksi janji suci

Endahe kahanan iso gawe sengseme ati

Angin kang sumilir amiyak swasana sepi

Aku lan sliramu keiket janji

Aku titah sudra tanpa bandha

Tanpa rupa, uripku kesrakap tanpa drajat tanpa pangkat

Amung tresna tulus pisungsung kanggo sliramu

Tampananen uripku uga jiwa lan ragaku

Dak suwun maring Gusti saben awan lan wengi

Aku lan sliramu tansah nyawiji