Wisata Alam Buatan Embung Kledung (future)

Embung Kledung Wisata Alam Buatan ingkang Narik Kawigatosan

       Embung Kledung ingkang mapan wonten ing Desa Kledung, perbatasan Kabupaten Temanggung-Wonosobo menika salah satunggaling wisata alam buatan. Embung Kledung menika sejatosipun sampun mlebet ing Kabupaten Temanggung, ananging  akses mlebetipun langkung gampil lan langkung caket saking Kabupaten Wonosobo. Sinaosa Embung Kledung menika wisata buatan, ananging wisatawan sami kepincut awit pemandhanganipun. Pemandhngan Embung Kledung panci endah sanget. Wonten ing sakiwa-tengenipun kathah tetuwuhan ingkang ndadosaken Embung menika sejuk. Tetuwuhan menika kadosta pinus, cemara, tetuwuhan maneka warni sekar, lan tetuwuhan ladhang pendhudhuk ing riku. Kajawi saking menika Embung ugi dipunapit kaliyan kalih gunung inggih menika Gunung Sindoro lan Gunung Sumbing. Pemandhangan kados menika ingkang nengsemaken manah. Menawi pengunjung menika madhep kilen, noleh nengen Gunung Sindoro, noleh kiwa Gunung Sumbing. Gunung Sindoro ingkang taksih ijo royo-royo awit taksih kathah tetuwuhan. Gunung Sumbing sampun kathah griya pendhudhuk, ananging taksih katingal endah.

Foto ing sisih tengen menika pemandhangan Gunung Sumbing ingkang katingal jelas saking Embung. Margi ingkang katingal wonten ing foto inggih menika margi kangge akses keluar-masuk pengunjung. Marginipun taksih rolakan, dereng alus aspalan. Dene ingkang katingal warni coklat menika memean mbako (jemuran tembakau). Sanesipun ingkang ijo royo-royo, menika taneman pendhudhuk. Pemandhangan ingkang asri lan saged ndadosaken tintriming manah. Menawi foto ingkang wonten ing nginggil piyambak menika foto pemandhangan embung ingkang ngadhep Gunung Sindoro. Toya ingkang katingal kipyah-kipyah menika embungipun. Gunung Sindoro kaliyan tetuwuhanipun katingal endah. Foto-foto kala wau nggambaraken pemandhangan ing Embung Kledung ingkang sejatosipun. Awit foto-foto kala wau dipunpundhut langsung kaliyan panyerat menapa wontenipun.

Hawa ingkang asrep nambahi swasana ing Embung Kledung menika sansaya tintrim. Angin ingkang sumilir, ngobahaken pucuk-pucuk pinus kepireng ayem. Menawi swasana ing Embung menika asrep sanget lan grimis, Gunung Sindoro lan Gunung Sumbing radi boten katingal amargi kenging pedhut. Sinaosa kados menika pemandhanganipun taksik katingal endah. Swasana-swasana menika ingkang ndadosaken Embung rame dipunkujungi wisatawan. Boten namung wisatawan saking Kabupaten Wonosobo lan Kabupaten Temanggung kemawon ananging wisatawan saking Kabupaten sanesipun ugi wonten. Diah (20) pengunjung saking Kabupaten Banyumas  “kalo menurut aku embungnya dan buat lingkungan sekitarnya udah bagus, Cuma kurang kesadaran diri dari pengunjung yang masih mencorat-coret sama buang sampah sembarangan”. Tuturan saking Mbak Diah menika wonten ingkang kedah dipungaris bawahi inggih menika tembung mencorat-coret lan buang sampah sembarangan. Panci kenyataanipun taksih wonten ingkang remen nyorat-nyoret lan mbucal sampah sembarangan, menika dados introspeksi kangge dhiri kita, menawi lingkungan menika kedahipun dipunjagi lan boten dipunrisak.

Wonten malih salah satunggaling pengunjung inggih menika Cholis (23) pengunjung saking Kabupaten Wonosobo  “kula kerep mbak, teng mriki, soale pemandangane apik, nek ngge menenangkan diri cocok, damai, suasanane nggih nengsemaken ati”. Menika penuturan saking pengunjung ingkang ngraos tintrim lan ngraosaken kaendahan wisata buatan Embung Kledung. Menawi liburan Embung Kledung menika dipunbanjiri pengunjung ingkang kathah-kathahipun pemudha-pemudhi.

 Menawi pengunjung menika dhateng Embung Kledung liwat Kabupaten Wonosobo ing perjalanan sampun dipunsuguhi pemandhangan ingkang endah kadosta kebun teh sepanjang margi Desa Belukan, Kabupaten Wonosobo. Lajeng dipunsuguhi pemandhangan kebun kubis ing Desa Kledung piyambak. Pemandhangan-pemandhangan ing perjalanan nambahi sengsemipun manah. Manah dados tentrem lan ayem. Embung Kledung wisata buatan ananging saged narik kawigatosan kathah pengunjung. Taksih asli lan kedah dipunuri-uri. Monggo kapan-kapan dhateng mriki, Embung Kledung ingkang asri.

Pemain asing lan Tim Nas nyengkuyung ing Turnamen Bal-balan (Straigh News)

Turnamen Kembaran Pemuda Cup dipunsengkuyung 
Pemain Asing lan Tim Nas

        Dhusun Kembaran, Wonosobo, Selasa (1/10/2013) Turnamen Kembaran Pemuda Cup kalampahan kanthi damai boten wonten kerusuhan. Turnamen dipunsengkuyung dening pemain-pemain asing kadosta Enzekuile Gonsalves, Louis Eduardo, Pizzaro, Robertino Kwateh, Marcio Souza, lan Slamet Nurcahyo. Turnamen Kembaran Pemuda Cup dipunanakaken kanthi ancas ngrumaketaken raos pasedherekan antwisipun dhusun satunggal kaliyan sanesipun. Turnamen menika ngrebataken piala pemuda cup lan arto kinten-kinten 8 ngantos 9 yuta. Wonten 32 tim ingkang nyengkuyung turnamen menika kadosta Lexotan (Laskar Ekstrim WonosoboWetan), Putra Satriya Simbang, Patriot Pringapus, tim saking dhusun Mulyasari, Campursari, Sumber Dalem lan sanesipun. Dinten menika jam 15:30 tim saking Dhusun Campursari kaliyan tim Putra Satriya Simbang badhe tandhing. Putra Satriya Simbang menika nggadhang-nggadhang Marcio Souza (33) pemain asal Brazil. Tim ingkang menang badhe majeng ing babak 4 besar.

Turnamen Kembaran Pemuda Cup Karawuhan Marcio S. lan S. Nur Cahyo (News Feature)

Marcio Souza lan Slamet Nur Cahyo Tumut ing Turnamen Kembaran Pemuda Cup

       Wonosobo, Selasa (1/10/ 2013) wonten turnamen bal-balan ingkang dipunakaken wonten ing Dhusun Kembaran, kecamatan Kalikajar, kabupaten Wonosobo, Jawa Tengah. Turnamen menika ngrebataken piala pemuda cup kaliyan arto kinten-kinten 16 yuta kangge juwara 1, 2, lan 3. Turnamen pemuda cup dipunanakaken amargi gadhah ancas ngraketaken pasedherekan dhusun satunggal kaliyan sanesipun. Wonten 32 tim bal-balan ingkang tumut ing turnamen, antawisipun Lexotan (Laskar Ekstrim WonosoboWetan), Putra Satriya Simbang, Patriot Pringapus, tim saking dhusun Mulyasari, Campursari, Sumber dalem lan sanesipun. Tim-tim kala wau sami mundhut pemain saking njawi kadosta Enzekuile Gonsalves, Louis Eduardo, Pizzaro, Robertino Kwateh, Marcio Souza, lan Slamet Nurcahyo. Pemain-pemain saking njawi menika sami nyengkuyung, ndadosaken lampahing turnamen sansaya rame, kathah tiyang ingkang mriksani, lan turnamen menika saged kalaksanan kanthi boten wonten kerusuhan utawi damai.

       Sejatosipun turnamen menika sampun kalaksanan saking tanggal 4 September 2013 kala wingi lan pungkasan utawi final benjing tanggal 6 Oktober 2013. Turnamen Kembaran Pemuda Cup menika dipunadani saben kalih taun sepisan, wonten ing Dhusun Kembaran. Dhusun Kembaran menika Dhusun alit ingkang asri, taksih kathah wit-witan ingkang ijo royo-royo. Lapangan ingkang kangge turnamen menika taksih langkung sae ketimbang lapangan wonten ing dhusun sakiwa-tengenipun. Turnamen Kembaran Pemuda Cup kalebet turnamen ingkang kathah pamiyarsanipun. Turnamen ingkang narik kawigatosan tiyang-tiyang awit saking tim lan pemain ingkang nyengkuyung.

Marcio Souza (33) ingkang miyos 14 Januari 1980 wonten ing Rio de Janeiro, Brazil menika tumut nyengkuyung lampahing turnamen. Dhewekipun mlebet utawi dipunbon kaliyan tim saking dhusun Mulyasari. Marcio Souza gadhah cathetan panjang wonten ing ranah bal-balan inggih menika sampun nate mlebet club Persela Lamongan, Semen Padang, Deltras Sidoarjo, Arema Indonesia wonten ing ISL, Persib Bandung lan samenika wonten ing club Perseman Manokwari. Babagan menika ingkang ndadosaken Turnamen Kembaran Pemuda Cup rame, amargi Marcio Souza ingkang sampun kawentar wonten ing jagading bal-balan, kawentar sae utawi apik, gesit, tumut nyengkuyung. Marcio Souza ingkang posisinipun dados penyerang menika dipununggulaken utawi dipungadang kaliyan tim utawi club saking dhusun Mulyasari kasebat.

Beda malih kaliyan tim utawi club Putra Satriya Simbang. Club Putra Satriya Simbang menika gadang-gadang Slamet Nurcahyo supados saged nyetak gol kemenangan.

Slamet Nurcahyo ingkang ugi sampun kawentar wonten ing tivi-tivi, utawi jagading bal-balan menika bersaing kaliyan pemain asing sanesipun. Slamet Nurcahyo (30) ingkang miyos wonten ing Jember, 11 Juli 1983 menika kalebet pemain ingkang lincah. Dhewekipun sampun asring tumut tim-tim bal-balan ing Indonesia kadosta, Persebaya Surabaya, PSS Sleman, Persiba Bantul, Persibo Bojonegoro, lan samenika mlebet wonten tim Persepam Madura United. Dhewekipun ugi nate tumut utawi mlebet ing Timnas U-23 lan Timnas Indonesia. Dhewekipun dipunbon kaliyan Putra Satriya supados bekta jeneng dhusun Simbang dados kawentar wonten ing tlatah Wonosobo. Dinten Rabu, 2 Oktober 2013 benjing, Putra Satriya Simbang badhe maju tandhing nglawan tim saking dhusun Sumber Dalem. Slamet Nurcahyo tegesipun kedah berjuwang supados saged mbobol gawang lawan. Dhewekipun kedah saged njunjung tim Putra Satriya Simbang, amargi dhewekipun menika ingkang dipungadhang-gadhang kaliyan tim saking dhusun Simbang menika. Menawi benjing Tim Putra Satriya Simbang menika saged menang nglawan tim saking dhusun Sumber Dalem, Tim Putra Satriya Simbang gadhah hak maju wonten ing 4 besar.

Referensi : www.wikipedia.com